انا اتغيرت
أنا شاب زى الاف الشباب الى بيتجوزوا
و كل معلوماتهم عن الجواز هى العلاقة الخاصة من الافلام الى كنا بنتفرج عليها
عمرى ماعرفت ولا حتى حاولت اعرف ازاى اتعامل مع مراتى لان كان عندى فكرة ان كل الستات هايفين و عقلهم صغير والحل معاهم انك تديلهم على دماغهم
كانت كل فكرتى انها لازم تبسطنى و تستحملنى
من الحاجات الى غيرتنى كلمتك :
حتى لو انت مش متعمد الغلط ...بس دا لايمنع ان الاخر اتأذى
و زى ما بتعتذر على انك طرفت عين واحد او دست على رجله او خبطته بالغلط
حاول تعتذر عن الجرح الى سببته لمراتك علشان دا هيساعدها على انها تسامحك و يرجع قلبها صافى تانى
كانت تعد تعيط منى و من عصبيتى و شتيمتى فى حجرتها و كنت بصراحة بسيبها لحد ماتهدى لوحدها
كانت بتهدى و تيجى تصالحنى هى مع ان انا الى غلطان
كنت بشوف عينيها و انا راجع من الشغل معيطة بعد مكالمة زعقت لها فيها و كنت بطنش و اقول فى نفسى ماهى لازم تستحملنى
كنت مبعرفش اعمل حاجة غير انى أنام معاها علشان احس ان هى خلاص صافية
بس لقيتها مع الوقت بدأت تعلى صوتها على و ترد
و تسيبنى مخاصمها بالايام
و حسيت انها معايا فى السرير بتأدى واجب
و بدأت تطنش طلباتى
و اكتشفت انها بتكلم ابن عمها الى متربى معاها و تشتكيله منى و كانت صدمة لما قريت كل الى فى قلبها
انا اتغيرت يادكتورة و بقيت باخد بالى شوية من كلامى معاها و تصرفاتى
و لو حسيت انى جرحتها بتأسف و احاول اراضيها
حسيت فعلا بفرق كبير بعد اى زعل
و لقيتها طيبة اوى و بتصفى علطول مجرد انى اقولها انا اسف و اطبطب عليها و ابوسها
و الخصام الى كان بياخد ايام مبقاش بياخد دقايق
ودا ساعدنى انى اتحكم فى اعصابى اكتر انى حسيت فعلا بالتغيير فى حياتنا
فعلا يادكتورة تصرفاتنا هى السبب الرئيسى فى صعوبة حياتنا
ياريت كل الناس تفهم كدة
ليست هناك تعليقات:
إرسال تعليق