لازم أمشيها على كيفى

يادكتورة هو انا لما أمشى بيتى على كيفى يبقى باقهرها ؟

أيوة لو كيفك مختلف عن كيفها يبقى بتقهرها
دلوقت هى طول عمرها ليها اصحاب و معارف كتير
شخصية اجتماعية و بتلاقى متعتها و سعادتها فى انها تكون مع الناس

لما حضرتك تمنعها من كدة و تقولها مالكيش الا بيتك و جوزك و تنسى الناس دول خالص و تروحى لاهلك كفاية مرة فى الاسبوع ..انت كدة بتقهرها

اسأل نفسك ...أنا هخس ايه يعنى و الا دا هيضرنى فى ايه لما تحافظ على صداقاتها و علاقتها باهلها ؟؟؟؟

لانك انت مابتحبش الاختلاط بالناس ...عايزها تمشى على مزاجك و متحبش هى كمان الاختلاط بالناس

زى بالظبط واحد بيحب السمك و التانى مش بيقبله ...
فيفرض عليه بالغصب انه لازم ياكل سمك ....أو التانى يمنعه تماما انه ياكل سمك

ليه الى بيكره السمك ماياكلش السمك
و الى بيحبه ياكله
ليه كل واحد مايبقاش براحته

أقعد معاها
و قل لها مخاطر الاختلاط الشديد بالناس بعد الجواز و المشاكل الى ممكن تظهر منها
كشف اسرارنا برة
تدخلهم فى حياتنا
المشاكل الى ممكن تحصل معاهم
ممكن تقصرى فى البيت

سيب لها الحرية و قل لها المشاكل الى مكن تحصل
و حملها المسئولية كاملة ...يعنى لو حصلت مشاكل انتى المسئولة

اديها حرية مسئولة ...علشان تتعود مع الوقت انها تختلط بس بحدود

بس مش حل انك تكبتها و تمنعها عن الناس كلها علشان سيادتك تريح دماغك و يجيلها هى اكتئاب

ياسيدى الناس مختلفون
و محاولتك تطبيعها بطباعك دا بيعمل عليها كبت و ضغط نفسى رهيب ممكن يجيب لها امراض نفسية مع الوقت
و للاسف احنا لاندركها و نفضل نضغط عليها علشان تتحسن و هى مريضة اصلا

انك تعيش بشخصية غير شخصيتك دا احساس قاتل للذات وقاتل للحب لانها دايما حاسة انها مسجونة جواك