ليه مش بنقدر نسامح ؟
مش بنقدر نسامح لما نكون حاسين بالغضب الشديد و أبشع أنواع الغضب لما تحس بالظلم و القهر
علشان كدة لازم تفرغ شحنة الغضب الى فى قلبك بأى وسيلة لاتضر أحد و اتكلمت كتير على قناة اليوتيوب عن الغضب و ازاى نقدر نتعامل معاه
مش بنقدر نسامح لاننا دايما بنقول لنفسنا انه مايستاهلش
مع ان التسامح دا علشان خاطرنا احنا نفسنا علشان نحس بالسلام فى قلوبنا و تهدأ أعصابنا مش علشان خاطر التانى
مش معنى انك تسامح انك تنسى او انك ترجع علاقتك بيه زى الاول و تبقوا حبايب ...مش مطلوب منك كدة
التسامح انك تهدى الغضب و الألم الى جواك ..و دا انت الى هتستفيد منه مش هو
مش بنقدر نسامح لاننا ماحسناش انه اتعاقب و انه نجى بفعلته
لكن ايمانك ان ربنا سبحانه وتعالى هو العدل و انه هياخدك حقك اما فى الدنيا و اما فى الآخرة ممكن تنزل على قلبك السكينة
و ساعات رؤيته بيتعذب بابتلاء اصابه ..او تعسير فى اموره بيحسسك بالعدل الالهى و يطمنك الى قصاص ربنا ...و يسكن غيظ قلبك
(ويشف صدور قوم مؤمنين ويذهب غيظ قلوبهم )
بدون شماته طبعا و هو الفرح بمصابه ودا احساس غير مقبول
مش بنقدر نسامح علشان عندنا رغبة قوية فى الانتقام و حاسين ان دا هو العدل انى أرد الأذى بمثله ..
مع ان رد الاذى معروف ان الرد يؤجج الصراع اكتر و يدخلك فى حرب استنزاف تستنزف اعصابك و صحتك ووقتك و راحة بالك
مش بنقدر نسامح لاننا شايفين الانسان الى ظلمنا شيطان رجيم و مش قادرين نشوف الجانب الانسانى منه
مع ان اى انسان مهما كان شره ..فيه جانب خير ...
و انه ما آذاك الا لخطأ صدر منه زى اى انسان ممكن يغلط و يفتكر كدة انه بيعمل الصح
حتى لو كنت متأكد انه يؤذيك كرها ...فدا المفروض و الله يصعب عليك لانه فى قلبه غل و كره بيعذبه ليل نهار
مش بنقدر نسامح لأن التانى لم يعتذر و لم يبد اى مشاعر ندم
بس افتكر برده انك لما بتسامح دا علشان تحس انت بالسلام و الهدوء النفسى ...انت نفسك ..مش علشان خاطر التانى
هل ممكن أسامح انسان مستمر فى الأذى و الاساءة ؟
طبعا مستحيل ان كان بيتعمد الأذى و عارف ان دا يؤذيك و يتعمد تكراره او تجاهلك
الا لو أخدت الموضوع بشكل غير شخصى كالطباع السيئة مثلا
يعنى واحد طبعه عصبى المزاج مع الجميع ..
يبقى هو طبعه كدة ..
جيناته فيها العصبية الى وارثها ...هرموناته سهلة الاستثارة .......
لم يتعود و لم يتربى من صغره على عمل سيطرة و كونترول على نفسه لعدم نضجه
فانت لو تعاملت معاه على انه مريض ..
و انه ساعة العصبية بيكون فى حالة جنان مؤقت ..لانه بيفقد السيطرة تماما على تفكيره و تصرفاته
مش هتاخد الموضوع على انه اهانة شخصية ليك ..
لكن دا انسان مريض و يمكن يصعب عليك ساعة ما تجيله الحالة
لو انسان قليل الذوق فى كلامه و تصرفاته ..و هو مع الكل كدة ..دى خلقته
يبقى مش هاخد كلامه الدبش و تصرفاته الحمقاء كانها اذى لى شخصى
لانه هو لابيفهم و لا يعى اصلا انه بيؤذى الناس بكلامه و تصرفاته دى
لو انسان عنده شوية نرجسية و متكبر و كل تفكيره فى احتياجاته و طلباته و رغباته و معندوش اى ادنى احساس بطلبات الآخرين و لا رغباتهم ..
وهو مع الكل كدة ...هو مش قصده يتكبر على انا بالذات ..هو دا طبع و جبله فيه
الحاجات الى هى طباع شخصية ممكن اوى نسامح فيها لو تعاملنا معاها على انها ليست ايذاء موجه الى انا شخصيا بل هو أذى يصيب اى حد يقترب منه
دى طريقة ممكن تسامح بيها
هل ممكن ننسى الاساءة ؟
ممكن ننساها لو لم تجرحنا بشدة ...لكن لو الجرح عميق و شديد و سايب أثر طبعا صعب يتنسى
فيه حد ينسى انه عمل عملية و الا وقع و رجله اتكسرت و الا عمل حادثة
كلما كان الألم أعظم صعب النسيان ..لكن ممكن تسامح
لازم تسامح نفسك الأول
فيه ناس عندها احساس مزمن بالذنب
و ممكن توصل للغضب من نفسها و فى بعض الاحيان الانتقام منها بايذاءها و تعمد افشالها
توقف عن لوم نفسك
مش طول النهار تعد تقول:
انا غبى
انا فاشل
انا تخين
انا عاصى
انا انسان سىء
انا زوجة فاشلة
لو كنت عملت كذا
لو كنت سويت كذا
كان فين عقلى لما اخترت كذا
انا اضحك على
الكلام دا مش هيفيدك بحاجة
كلنا فينا نقص
كلنا اتعرضنا للفشل
كلنا اتصرفنا كتير بغباء
كلنا عصينا ربنا
مفيش حد كامل فى الدنيا دى
بدل ما تركز تفكيرك على لوم نفسك
ركز تفكيرك على انا هعمل ايه الخطوة الجاية
سيب الماضى فى حاله ..و اعمل نقطة و من أول السطر
و ياريت تقلب الصفحة خالص
احترم نفسك مهما كانت اخطاءك
فكل ابن آدم خطاء و محدش بيتعلم بالساهل
فكر فى الى هتعمله بكره
سامح نفسك على اخطائها ...لانك مكنتش عارف انك هتوصل للنتيجة دى
و بطل لومها ...و بطل لو ...فانها تفتح عمل الشيطان
قال النبي صلى الله عليه وسلم :
( الْمُؤْمِنُ الْقَوِيُّ خَيْرٌ وَأَحَبُّ إِلَى اللَّهِ مِنْ الْمُؤْمِنِ الضَّعِيفِ وَفِي كُلٍّ خَيْرٌ احْرِصْ عَلَى مَا يَنْفَعُكَ وَاسْتَعِنْ بِاللَّهِ وَلَا تَعْجَزْ وَإِنْ أَصَابَكَ شَيْءٌ فَلَا تَقُلْ لَوْ أَنِّي فَعَلْتُ كَانَ كَذَا وَكَذَا وَلَكِنْ قُلْ قَدَرُ اللَّهِ وَمَا شَاءَ فَعَلَ فَإِنَّ لَوْ تَفْتَحُ عَمَلَ الشَّيْطَانِ )
كيف اتحمل الاساءة ؟
عارف العيال التلمة الى لو هددتهم بعقاب أو حرمتهم من حاجة يقولك و لا يهمنى !!!!!
حاول تعمل كدة مع من يتعمد ايذائك و لا تسمح له بأن يؤثر على تقديرك لذاتك و احترامك ليها
وقل له : و لا يهمنى
هو اكيد صعب
بس ممكن
فيه فرق بين التسامح و عدم التقدير و الاحترام للذات
يعنى مثلا :
فيه ستات ممكن تستحمل الشتيمة و الاهانة و حتى الضرب من جوزها عادى أو من والدها أو أخوها
لان هى تقديرها و احترامها لذاتها اصلا فى الحضيض
يعنى هى عندها قناعة انها تستاهل الى بيجرالها
و بتصل لدرجة التناحة و عدم التأثر
و فيه راجل بيتحمل اهانة مديره و شخطه و نطره و قلة ادبه عليه و يعد يتزلف ليه علشان لقمة العيش
دا تقديره و احترامه لذاته بينهار
لدرجة انه بيوصل ان الاهانة لاتؤثر فيه و لا تضايقه
دا مش اسمه تسامح ابدا
دا انهيار للذات و انهيار لتقديرها و احترامها ونظرتها لنفسها
وهذا ما تفعله الدكتاتوريات فى الشعوب التى أدمنتها
الفرق بين التسامح و العجز
التسامح يكون عند القدرة على رد الاساءة بمثلها
فهو اختيار القوى
العجز هو عدم القدرة على الرد او حتى وقف المسىء عند حده و الاستسلام للمزيد من الاساءة
شخصيات ماينفعش معاها التسامح
قال : يادكتورة فيه شخصيات ماينفعش معاها التسامح دا
كلما تسامحنا معاه زاد فى جبروته و ظلمه
بالفعل
فيه نوعيات فاكرة ان التسامح ضعف و دا يدفعها الى المزيد من الظلم له
فان كنت تملك من القوة الداخلية انك تقف امامه و تحد من ظلمه و تقول :لا
فبها و نعمت
و ان كنت لاتملك هذه القوة ...فابنيها فى نفسك بالتدريج حتى تكون قادرا على المواجهة و لا تقف ضعيفا مستسلما
و ان كنت لاتستطيع المواجهة و لا بناء ذاتك فاخرجه تماما من حياتك و انج بنفسك
وان كنت من الضعف انك مش قادر على حاجة من دى استعن بصديق او اخصائى نفسى يعينك على اصلاح مافسد من نفسك و تقوية مابها من ضعف
ليست هناك تعليقات:
إرسال تعليق