من الطبائع المختلفة الى بتعمل مشاكل كتيرة بين الناس
ان يكون احدهما حساس و الآخر أقل حساسية
واحد عايش بتلقائية تماما و بيتصرف على طبيعته و لا يشعر باحساس الآخرين و مشاعرهم
و التانى واخد باله من النظرة و اللفتة و الكلمة و الحركة و مركز أوى فى كل تصرف و كل كلمة صدرت من الآخرين و يفسرها تفسيره الخاص
فأى مشكلة بتبدأ ان الطرف التلقائى بيتصرف تصرف غلط او مؤلم للآخر
فيقوم الطرف الحساس يعبر عن المه و غضبه (انت ازاى تعمل كدة؟ )
فيقوم الطرف التلقائى يدافع عن نفسه و يقول مكانش قصدى و يبرر فعلته الى هو حاسس انها ما تزعلش اصلا
فالتانى يتغاظ اكتر و يتفرس اكتر ...و تبدأ الخناقة
احبائى
مش كل الناس حساسيتهم للمواقف زى بعض
حساسية الناس للتفاصيل بتختلف من واحد للتانى
الانسان التلقائى دا فعلا لايقصد الأذى و لازم تكون متأكد من دا و فاهمه كويس و ماتقفش على الواحدة ليه ...هو مش فى دماغه اصلا الحاجات الصغيرة دى ..سواء مجاملات او ذوقيات
الانسان الحساس للاسف مش بيقدر يتحمل دا
و بيعتبرها قلة ذوق و احساس
و يبدأ يتخانق كما ان لو الاذى مقصود و هو فعلا مش مقصود
و يستعجب هو التانى مش حاسس بغلطته ازاى
بس دا لا يمنع انه اتأذى بالفعل
طب الحل ؟
الحل اننا نفهم و ندرك و نوقن و نتأكد اننا مختلفين فى درجة حساسيتنا
و الطرف الحساس يبقى واثق ان التانى لايقصد الاساءة هو بيتصرف بشكل تلقائى بدليل انه كدة مع كل الناس الى حواليه ...هو بيبقى طبع
و انه يلفت نظره بمنتهى الاحترام و الذوق و بدون لوم و عتاب و اصدار احكام و اتهامات
انا اضايقت لما حصل كذا و كنت اتمنى انك تعمل كذا ....بس خلاص
و مش معنى كدة ان التلقائى خلاص هياخد باله
الكلام دا يتكرر مرة و اتنين و تلاتة و عشرة لحد ما يبدأ ياخد باله
حط فى بالك انه بيتصرف بتلقائية و لا يقصد الاذى ..لحد ماتبدأ تتعود على طبعه بالتدريب
وحط فى بالك انه حساس حبتين و لايقصد انه ينتقدك و يطلعك غلطان فى كل موقف او يقلل من قدرك ..ركز فى الى بيقوله و حاول تتجنب مايؤذيه فى التعامل معاه بالتدريب
علشان مش كل كلمة و كل تصرف يتعمل عليه مشكلة
لو الاتنين راعوا بعض فى النقطة دى مشاكل كتير اوى هنتجنبها
ليست هناك تعليقات:
إرسال تعليق