العلم مسئولية و ليس رفاهية

مفهوم عايزينه يرسخ فى ذهن اطفالنا من صغرهم
و ياريت يرسخ فى اذهاننا احنا كمان
باننا نعد نقول و نعيد و نزيد و نكرر فيه طول ماهم فى مراحل التعليم المختلفة لحد ما يتبرمجوا عليه

من اول سن الحضانة بنقوله باسلوب بسيط جدا
و لحد سن الجامعة بنكبر الاسلوب و الطريقة

و ياريت يرسخ عند الاباء هذا المفهوم ايضا و نربى نفسنا عليه
علشان طول ماهو شايفك مش بتتعلم حاجة و لا حريص على علم ...اى علم
طيب يبقى اشمعنى انا لازم اتعلم و اذاكر

انا قلت و دايما و لازلت بقول لاولادى و بكرره كل شوية لما يتنسى ..باساليب متنوعة
لحد ما زهقوا منى و بقوا يقولوا عارفين ...
العلم مسئولية و ليس رفاهية

احنا فى حياتنا مطلوب مننا عدة مهام
حاجات بنعملها علشان بنحبها
و حاجات بنعملها علشان دى مسئوليتنا حتى لو مش بنحبها

بقول لهم :
انا مش بحب الطبيخ و لا التسوق و لا السواقة ...بس دى مسئوليتى و لازم اعملها
و بابا مش بيحب التسوق ولا شغل البيت و لا الشغل المرهق ...بس دى مسئوليته و لازم يعملها
و انتم مش بتحبوا النظافة و الترتيب و الدراسة بس دى مسئوليتكم و لازم تعملوها

ليه لازم ؟

زى ما الاكل و الشرب و اللبس و النوم و الرياضة مسئوليتنا عن اجسادنا

فربنا وهبنا العقل و مسئوليتنا اننا نحافظ عليه و نكبره و ننميه

العقل زى الجسد محتاج تغذية

و غذاء العقل المعلومات ....
كل ما بتعرف معلومات كل ما عقلك بيكبر و ينضج و يتغذى احسن

و المدرسة و المذاكرة احد و سائل تغذية العقل المهمة الى بتعرف بيها معلومات كتيرة فى مجالات كتيرة

علشان كدة العلم و الدراسة مسئولية زى الاكل و الشرب بالظبط و ليس رفاهية

قولوا ورايا و احفظوا و اتعلموا و حفظوا اولادكم

العلم مسئولية و ليس رفاهية
العلم مسئولية و ليس رفاهية