أفكار لتشجيع ولادك على المذاكرة

قدرة ابنك على التركيز المتواصل لا تتجاوز 20 دقيقة
لو حسيت انه ركز لهذه الفترة كلها على بعضها
علمه انه ياخد راحة علشان يقدر يستعيد تركيزه تانى

و الراحة دى مش ساعة 
الر احة دى خمس دقايق بالكتير لحد ما يخلص كل واجباته و بعدين يلعب براحته

لكن لو طفل مش مركز أصلا بنحاول بالتدريب المتواصل اننا نزود مدة تركيزه
يعنى لو الاسبوع دا مش بيركز الا تلات دقايق
الاسبوع الى بعده هحاول اخليه يركز 5 دقايق
الى بعده هشجعه انه يزود الى 7 دقايق
وهكذا بالتدرييييج مش بالصراخ و الشتيمة

اختار منهاج التعليم المناسب لابنك

اتعجب بالفعل من ناس مصممة تودى ولادها مدارس ازهرية فيها كمية كبيرة من المناهج و مواد الحفظ و امكانات ولادها و قدرتهم على الحفظ لا تتناسب نهائى مع المناهج دى

و الا ناس مودية اولادها مدارس بريطانية تدرس المنهاج البريطانى الاصعب في حين ان المنهاج الامريكى متاح و هو الاسهل

ليه عايزين نصعبها على اولادنا ؟
ليه حاسين ان الأصعب هو الافضل ؟

طالما فى النهاية كل الشهادات هتتساوى أدام مكتب التنسيق ...طب ليه نعذبهم ؟

مدارسنا بتركز أساسا على الحفظ

و دى حاجة مش وحشة ..
تقوية ملكة الحفظ بتعلم الطفل ازاى يقدر يركز و يخزن المعلومات و يسترجعها عند الضرورة ..و دى مهارة من مهارات التفكير

هى المشكلة ان المدارس بتهتم بالحفظ بس ..فقط ..كما لو انها المهارة الوحيدة

بتهمل الفهم
بتهمل بقية مهارات التفكير
بتهمل كيفية استخدام المعلومة و ربطها بالمعلومات التانية
بتهمل مهارة البحث عن المعلومة
بتهمل كيفية التفكير الابداعى و النقدى

المهارات دى مش بيعلمها النظام التعليمى و لا المدرسين الخصوصيين
المهارات دى مهم تتعلمها انت الأول علشان تقدر تعلمها لأولادك

لما تعد تجبر ابنك على المذاكرة و شايفك طول النهار قاعد أدام التليفزيون و الا على اللاب و الموبايل بتلعب ألعاب

الطفل بيحس بالظلم
هو ليه الكبار عايشين حياتهم و انا الى مزنوق فى النيلة دى

حاول تمسك كتاب أدام ابنك
حاول تفتح كتاب أون لاين و تقرأ فيه و توريله انك بتقرأ انت كمان و بتتعلم أهو

لاحظت ان أغلب اولاد الاطباء و أساتذة الجامعة و الناس الى علطول بيذاكروا طالعين معندهمش مشاكل فى المذاكرة لانهم شايفين دايما آباءهم بيتعلموا

علشان ترسخ عند الطفل أهمية العلم لازم يشوفك انت كمان بتتعلم