علشان تبطل كسل

* لما تحس ان ثقتك فى نفسك فى الحضيض

اكتب فى ورقة أدامك
تلات صفات حلوة انت بتحبها فى نفسك
او تلات تصرفات لطيفة انت عملتها قبل كدة

بص فى الورقة كل ما تلاقى نفسك متضايق و قرفان
كتير أوى بنكون محتاجين حد يقولنا انت كويس ..
ما تستناش ..قلها لنفسك

* علشان تعالج كسل النفس محتاج دافع ..دافع يدفعك للحركة
هذا الدافع
اما دافع داخلى ...يعنى انت عايز تعمل حاجة علشان بتحبها و عايز تعملها و بتستمتع بيها و بتحس بالتحدى و الانجاز لما تعملها

او دافع خارجى ..يعنى عائد ما او منفعة او مصلحة تجنيها من عملها ...هذ العائد ممكن يكون مادى (فلوس مثلا ) أو معنوى ( شهرة او سلطة او شهادة مثلا )

الدافع و الحافز الداخلى اقوى كثيرا من الحافز الخارجى

*علشان تعالج الكسل محتاج تحط أهداف

اللاعب الى بيخليه يتحفز لمواصلة اللعب هو تحقيق الأهداف
طول ماحياتك ماشية بدون اهداف هتلعب ليه و هتتحرك ليه ؟

و الاهداف دى فى كل مجالات حياتك

أهداف ذاتية للتطوير الذاتى
أهداف أسرية ...لطوير التواصل و العلاقات
أهداف اجتماعية ..هتقدم ايه لمجتمعك
اهداف فى مجال العمل ...ناوى تنجز ايه او تضاغف مرتبك او تحصل على ترقية

علشان تتحمس لعمل ما لازم يكون أدامك هدف عايز تحققه

*علشان تتحمس و تبطل كسل لحاجة لازم تحس بمشكلتك أولا
و بعدين تتعلم و تنمى مهاراتك ....فالانسان عدو مايجهل

طول ما الدنيا ماشية رتيبة و مملة و كل الايام زى بعض و المشاكل متكررة و مش لاقيين لها حل ...معندكش اى حافز للتغيير

لسة امبارح واحدة بتسألنى

ايه الدافع الى خلاك تاخدى جانب التنمية البشرية و الارشاد الاسرى ؟...أنا بزهق اوى لما اقرأ فى الحاجات دى

قلت لها اول دافع لى كان الفشل
لما حسيت انى مش راضية عن نفسى و مش لاقياها و حاسة انى تايهة
لما حسيت فى مرحلة ما اننا فشلنا فى حياتنا الزوجية و احنا الاتنين مش سعداء و المشاكل بتزيد لدرجة مش عارفين نتكلم مع بعض
لما حسيت ان ولادى مش هم دول النماذج الى كان نفسى اطلعها ابدا

دى كانت بداية التعلم ..و بدأت اقرأ ..و آخد دورات
و كل ما قرأت تعلمت جديد ..
و عرفت احنا فشلنا ليه ...
و حاولنا نصلح ..
و لما نصلح و نلاقى نتايج ايجابية دا بيديك حافز انك تتعلم اكتر
و تلاقى ناحية تانية اتصلحت افضل ..
و هكذا

و من يومها و انا شخصيا لايمر على يوم لا اقرأ فيه فى مجالى ..و كل يوم اتعلم جديد

*علشان تبطل كسل ..
ابعد عن الناس السلبيين الى بيحبطوا اى حد يقعد معاهم ..و بيحبطوك انت شخصيا
و قرب من الناس المؤمنين بيك ..المحفزين ليك ..المشجعين الدافعين
او الناجحين فى حياتهم بصفة عامة علشان تتعدى من نشاطهم و حماسهم

طول ما انت محاوط نفسك بالسلبيين القاعدين المثبطين ..عمرك ما هتتتقدم خطوة
و أخيرا 
افهم نفسك كويس
افهم ايه نقاط القوة عندك و نقاط الضعف
طول ما انت باصص لضعفك و عجزك و كسلك ...طول ما هتفضل كسول و عاجز و مش بتتحرك
ركز على نقاط قوتك اكتر من نقاط ضعفك ..و شوف هتقدر تستثمرها ازاى

ركز على الفرص الى حواليك اكتر من تركيزك على المعوقات
التركيز على المعوقات طبعا هيحبطك و تخليك تكسل انك تعمل اى حاجة

واحدة كانت بتسألنى جوزى مش راضى يخلينى أدرس ماجستير
قلت لها : طب انتى محتاجة لجوزك فى حاجة ..يعنى هو هيصرف عليكى ؟
قالت : لأ انا لى دخلى الخاص ...و هو اصلا مسافر الخارج
يعنى انتى مش محتاجاه اصلا فى حاجة ..طب ليه تركزى على انه مش موافق ...
و ما ركزتيش على الفرصتين الهايلة دى (انه مسافر و انك مش محتاجاه ماديا )

دا حتى التعليم دلوقت أون لاين ..و ممكن تاخديها من منازلهم
ادرسى الماجستير الى انتى عايزاه من غير ماجوزك يعرف
طول ما انت شايفة جوزك معوق ..عمرك ما هتتحركى

و غالبا مفيش راجل عربى بيشجع مراته على الدراسة
و لا ست عربية بتشجع جوزها على الدراسة
طالما الشهادة مش هتجيب فلوس

لو عايز تدرسى علشان الشهادة خديها اون لاين
لو عايزة تدرسى علشان العلم برده خديها اون لاين