الثقة بالنفس ليست فى كل وقت

مش لازم تكون واثق من نفسك فى كل وقت و كل موقف بتتعرض ليه فى حياتك

فيه حاجات انت فعلا ماتعرفهاش او مش قادر تتطور و تتحسن فيها أو مخك متربس فى تعلمها و مش قادر

انا شخصيا بتعب جدا من قيادة السيارة و مبعرفش أركن و أخدت كورسات و مفيش فايدة ..
فمش بحس أبدا بالثقة فى نفسى و أنا سايقة العربية ..مع انى نادرا لما بعمل حوادث لانى بمشى بسوق هادى و ببقى حذرة جدا ..بس طول ما انا ماشية بتشتم :)

ثقتى فى نفسى نص نص وأنا واقفة فى المطبخ لانى مش بحب الطبيخ و بحس ان الأكلات الكبيرة الى بتاخد وقت بتوترلى أعصابى جدا و غالبا مش بعملها أصلا ..
و مهما اتعلمت و حاولت اعصابى و توترى وزهقى بيخلينى أبوظ الأكل لانى بستعجل و عايزة أخلص منه

فى حين انى بكون واثقة من نفسى جدا فى أغلب مواقف حياتى التانية سواء كنت لوحدى او فى التجمعات

أفتكر و أنا طالبة كنت متفوقة بفضل الله تعالى فى كل المواد بس ربنا ابتلانى بغباء بلاغى ...مكنتش بفهم البلاغة نهائى ..و كنت ببقى قاعدة فى حصة البلاغة زى الطالب البليد المنزوى فى آخر الفصل و خايف المدرسة تسأله

مش ممكن هتحصل على الثقة بالنفس فى كل حاجة فى حياتك لانك اكيد عندك نقاط قصور و ضعف مش راضية تتصلح

و دا مش عيب فيك ...كل الناس كدة ..لازم يكون عندهم نقاط قصور و ضعف فالكمال لله وحده