مفيش بنى آدم فى الدنيا معندوش بعض الظروف الوحشة
و مفيش بنى آدم فى الدنيا كل ظروفه وحشة
و مفيش بنى آدم محظوظ فى كل حاجة و معندوش اى ظروف وحشة
الانسان الواثق فى نفسه بيبص لظروفه بشكل موضوعى تماما بدون أفورة ..و بدون برده استهانة بيها
من الحاجات الى دايما بعملها لنفسى كل فترة لما الاقى الدنيا اسودت حبتين ..
التقييم الموضوعى لنفسى و لظروفى و هو مايطلق عليه swot analysis
Strengths ...مناطق القوة لديّ
Weaknesses..مناطق الضعف عندى
Opportunities ....الفرص الموجودة حواليّ فى ظروفى
Threats...المعوقات أو التحديات الموجودة حوالي فى ظروفى
لما تتحرر من النظرة السوداوية و التفكير المتشائم و المشاعر السلبية
و تحاول تفكر بموضوعية هتلاقى ظروفك فيها فرص ممتازة ممكن تخليك تعمل حاجات كتير اوى
دا فيه ناس كمان عندهم القدرة على انهم يحولوا المعوقات الى فرص
زوجى مسافر للعمل ...وهى حاسة دايما انها مضغوطة و مكتئبة مع انها ممكن تكون فرصة ممتازة ووقت فاضى و حرية فى الحركة ممكن تعمل فيها حاجات كتير ماتقدرش تعملها و جوزها موجود
اعمل فى بلد عربى و مش عارف اجيب اسرتى ..دا ممكن يكون فرصة هايلة انك تطور نفسك فى مجالك و تاخد كورسات او تدرس و تاخد شهدات او تشتغل اكتر و تعمل فلوس اكتر تخليك تتطور و تترقى فى عملك
اتجوزت من سنتين و الحمل اتأخر ...دى فرصة ممتازة انك تقوى علاقتك بجوزك و تعيشوا شهر عسل طويل الأمد و تستمتعوا بالحياة و الانطلاق مع بعض
أولادى كبروا و كل واحد مع اصحابه و اشعر بالفراغ ..دى فرصة هايلة تقوى علاقتك بشريك حياتك او باصدقائك و اهلك و تعيشوا ايام الشباب تانى بعد التخفف من المسئوليات
طول ما انت شايف الدنيا سودة و مركز على ظروفك الوحشة هتفضل سودة
انزع النظارة السودة
و حاول تفكر فى الفرص الكويسة الى أدامك
و فى نقاط القوة لديك الى ممكن تستغلها كويس
والذكاء انك ازاى كمان تحول الظروف الوحشة الى فرص
ليست هناك تعليقات:
إرسال تعليق