قالت : حضرتك بتعدى تكتبى ازاى تتكلمى و ازاى تفكرى وازاى تتصرفى و ازاى...وازاى ...
تفتكرى التغيير دا بيعمل نتيجة فى تغيير الزوج؟
حبيبتى :
لازم تحطى فى بالك دايما ان القلوب بين اصبعين من اصابع الرحمن يقلبها كيف يشاء
و محدش بيقدر يغير حد ..دا حتى اولادنا فى سن معين مابتقدريش تغيرى اى حاجة فيهم خلاص
فأنا نفسى فعلا الزوجات و الامهات لما يحاولوا يغيروا تفكيرهم و اسلوبهم و تصرفاتهم مايبقاش كل تركيزهم على النتيجة
انتى لو اقتنعتى ان التفكير الفلانى او التصرف الفلانى صح ..اعمليه علشان هو صح مش علشان تغيرى حد
لانك لو دايما بتنتظرى العائد و مالقتيش فايدة عاجلة ..
.هترجعى الى سلوكك القديم بسرعة رهيبة و هتقولى مفيش فايدة
زوجات كتير تقول انا عملت الى انتى قلت عليه و مفيش فايدة
حبيبتى انا لا املك مفاتيح تغيير الآخرين الشخصية و لا اعرفها
انتى الى المفروض تدورى عليها
أنا بقولك التصرف السليم فى المواقف المختلفة ..
ممكن يجيب نتيجة سريعة و دى بتحصل مع نساء كتير و اغلبهم بيبقى عرايس جدد خلال سنوات جوازهم الاولى
و بفضل المولى بيبعتوا يشكرونى على التغيير الى حصل فى حياتهم
و ممكن يجيب نتيجة بعد فترة طويلة و دى بتحصل فى الجواز الى بقاله سنين طويلة
فعلاج خطأ مستمر بقاله سنين طويلة محتاج سنين علشان يتعالج
و فيه حالات مفيش معاها أى فايدة
اعملى حبيبتى الصح لو مقتنعة بيه علشان هو صح
اما النتيجة فدى أنا لا املكها و لا حد يملكها ..
فانت لاتملكين الا نفسك فقط لاغير
أنا كنت داخلة الزواج و حاطة لزواجى و لاولادى و بيتى صورة و نمط معين عايزة احققه
و قعدت سنين طويلة احاول اغير فى زوجى و اولادى و بيتى علشان يوصلوا للصورة الحلم و لم أفلح و زادت مشاكلى يوم بعد يوم
فبدأت أغير فى نفسى أنا ...أفكارى و تصرفاتى و بدأت أقرأ و أتعلم
حاجات كتير اتغيرت الى الافضل بالنسبة لى بفضل المولى عز وجل
و حاجات كتير برده معرفتش أغيرها
و تقبلت هذا الامر تماما لانى ادركت تماما انى مش هقدر الا على نفسى
و معدش الاخطاء و القصور من الآخرين بيسبب لى ضغط نفسى زى الاول
لانى ايقنت ان الكمال لله وحده
ولانى أيقنت ان الكمال الى فى خيالى مختلف عن الكمال الى فى خيال زوجى مختلف عن الكمال الى فى خيال اولادى
طالما مفيش اخطاء شرعية تصدر منهم (الحرام ) من الكبائر..
فكلنا بنعمل صغائر ومحدش معصوم
طالما مفيش اخطاء اخلاقية فاحشة ..كلنا ممكن نغلط
طالما مفيش اخطاء قانونية ..يبقى الحمد لله
الاخطاء الاجتماعية (العيب ) بتغاضى عنه طالما مش مؤذى لحد ...فالاصل أن لاضرر و لاضرار
لما قللت سقف التوقعات من زوجى و اولادى ...
و رفعت سقف التوقعات لنفسى
وركزت على ما أملكه حقيقة
استرحت و أرحت
والحمد لله تعالى على نعمته و فضله
ليست هناك تعليقات:
إرسال تعليق