قالت : هل ممكن اطلب انه يجيب لى هدية فى عيد ميلادى ؟
ايوة ممكن
قوليله بطريقة ظريفة وواثقة
انا هكون سعيدة اوى لو جبت لى هدية فى عيد ميلادى
و ياريت تحددى انتى عايزة ايه لانه بيتلبخ و بيبقى مش عارف يجيب ايه
و لو ماجابهاش ما تضايقيش و لا تلوى بوزك
و تقوليله كنت فعلا اتمنى انك تجيب لى الهدية الى قلت لك عليها و تنساش ياحبيبى
الرجل عنده استعداد يقول نعم لما يبقى عنده الحرية يقول لأ
ركزى فى القاعدة دى كويس
عايزة حاجة اطلبيها و لما ما يعملهاش ماتزعليش و تتقمصى و تعملى حكاية
هتلاقيه مع الوقت و بعد فترة
لما يحس انه ممكن يقول لا من غير خناق وزعل
هتلاقيه بيحرص على انه يلبى طلباتك
بس على فترات متباعدة جدا مرة فى السنة مثلا
ولو عملها احتفلى و حسسيه انك فى منتهى السعادة و اشكريه و امدحيه علشان يبقى فرحان بنفسه و يتشجع انه يعملها تانى
و لو ماعملهاش التمسي له العذر و قوليله انا عارفة انك نسيت ( حتى لو كان مطنش )
رجالة كتير بتخاف تلبى طلبات زوجاتهم بسبب خايف انها تسوء فيها و طلباتها تكتر
خلى طلباتك عزيزة و قليلة
و ممكن يكون فعلا بينسى و مشغول جدا بحاجة شغلاه حتى لو كانت السياسة و الكورة فمخه متركب على الاهتمام بحاجة واحدة بس
و ساعات بيحسوا بهيافة الطلب ادام كل الانجازات الفظيعة الى هو بيعملها
خليه يحس لما يعمل حاجة بسيطة انها عمل خرافى
و ساعات بيبقى خايف من رد الفعل و انك تسخرى مثلا من قلة ذوقه فى الشراء او تستقلى الحاجة الى بيجيبها
مرة واحدة بتحكيلى انها راحت اشترت لنفسها الحاجة الى نفسها فيها و ذوقتها و كتبت عليها كلمة لطيفة
و قالت له : ممكن تديهالى فى عيد ميلادى بطريقة رومانسية ؟
بتقولى بعد كدة فهم هى عايزة ايه و ازاى و بدأ يعمل
المرأة الذكية بتفهم دماغ جوزها و بتعرف بالظبط ازاى تأثر فيه
ليست هناك تعليقات:
إرسال تعليق