قال صديقى :الستات دايما عايزين الرجالة تفهم انهي كلام اللي بتقوله الست و تقصد بيه معني تاني
وانهي كلام بتقوله وتقصد عكسه
وانهي كلام بتقوله وتقصده وانهي بتقصد نصه وانهي بتقصد حتة صغيرة منه
وانهي كلام من كلامها معناه انها هتقوم تقتله او انها محضراله مصيبة
...................
هى مشكلة كبيرة بالفعل و عند أغلب النساء
المرأة نفسها ساعات بتكون مش عارفة و لا فاهمة هى عايزة ايه اصلا ..مش فاهمة نفسها ..
و دى حاجة بتتعبنى انا شخصيا عند تلقى الاستشارات
يعنى تحكيلى قصة طويييييلة ..و بعدين لما اسألها طب انت عايزة ايه او فين السؤال علشان اجاوبك ..تتوقف
لكن استشارات الرجال بيكون القصة مختصرة جدا و السؤال محدد جدا جدا
المرأة غالبا بتكون محتاجة مشاعر معينة من جوزها .مشاعر حب ..مشاعر قبول ..مشاعر احترام ..مشاعر اهتمام ...و عارفة ان دا احتياجها
بس مش عارفة ايه التصرفات الى هى عايزاها من جوزها تحديدا
يعنى تقولى عايزة اهتمام
اقولها يعنى عايزه الاهتمام دا يترجم فى سلوكيات ايه تحديدا ..
يعنى عايزة من الراجل يعمل ايه علشان تحسى بالاهتمام دا ؟
تقولى هى المشاعر ممكن تتحدد عايزة احس بمشاعره هو لازم تكون طالعة منه
ماهى المشاعر دى لازم تترجم فى تصرفات معينة
لو عرفت و طلبت من جوزها سلوكيات و تصرفات محددة هتريحه كتير جدا
المرأة كمان ممكن تكون فاهمة مشاعرها ..
وعارفة التصرفات الى بتحسسها بكدة بس تتكسف تطلب و تعتبر ان دا اهدار لكرامتها و كأنها بتشحت منه المشاعر
و ان المفروض تيجى من نفسه مش هى الى تطلبها
ودا غلط لان دى مش شحاته ..زى ما بتطلبى طلباتك المادية من حقك تطلبى طلباتك العاطفية برده ..
بس طبعا اسلوب الطلب عليه عامل كبييييير اوى فى حدوث الاستجابة
وعلشان تتجنب الاحراج دا و تتجنب ألم الرفض و عدم الاستجابة بتطلبها بشكل غير مباشر تماما و بتختبره هيستجيب ازاى ؟؟؟
ودا بيخلى الراجل فى حيص بيص ...لانه مش بيفهم الكلام غير المباشر دا ابدا
زى عبعال بتاع مسرحية ريا و سكينة الى كان بيفهمها و هى طايرة
ودا غير الطناش طبعا بتاع الراجل الى فاهم و عارف بس مكبر دماغه
مثال :
يقولها انا نازل رايح لاصحابى
تقوله مع السلامة ياحبيبى (وهى بتجذ على سنانها )
هو فهم انها مبسوطة و بتقوله مع السلامة
يفاجأ لما يرجع بالبوز المتين و يعد محتاس هو فيه ايه ؟؟؟
و لو الموضوع متكرر بيبدأ يطنش تماما ..لانه مش فاهم أصلا البوز دا ليه
هى عايزاه يقولها اصحابى متجمعين النهاردة بس انا هسيبهم و اعد معاك ...ياسعدها و هناها لو فهم من غير ما تتكلم
وعلى فكرة الرجالة السعداء فى حياتهم الزوجية هم الى بيقدروا يفكوا الشفرة دى و يفهموا الستات عايزة ايه بالظبط
و فيه ستات بأة لو عارفة و فاهمة و طلبت و قعد معاها بناء على طلبها تقول : القاعدة مالهاش طعم كان لازم يعملها من نفسه من غير ما أطلب ...لازم يحس بى ..المشاعر ما تطلبش
المشاعر حبيبتى ماتطلبش فعلا لكن التصرفات ممكن تطلب
لان الراجل ممكن يكون بيحب و يهتم بس مش عارف يعبر عن حبه و اهتمامه دا ازاى
بجد بجد الرجالة غلابة فى نقطة فهم النساء تحديدا و ربنا يعينهم علينا
ليست هناك تعليقات:
إرسال تعليق