قال : يادكتورة احنا مختلفين تماما فى كل شىء مفيش حاجة عارفين نتفق عليها ابدا
ماهو دا الطبيعى ياابنى
كل واحد فيكم اتربى و هو شايل جينات مختلفة
و اباء مختلفين
و مدراس و اصحاب مختلفين
و عادات و تقاليد مختلفة
و عنده خبرات مختلفة
دا غير الاختلاف الاصلى الى بين الرجل و المرأة عموما
انت لو ليك توأم هتلاقوا نفسكم مختلفين
دا طبيعى جدا
المشكلة الى بتحصل عند الاختلاف ان كل واحد فيكم فاكر نفسه هو الصح و التانى غلط
و بتحاولوا تقنعوا بعض بالمنطق و العقل بدا
وطالما كل واحد فيكم فاكر نفسه صح يبقى مستحيل هيقتنع بالتانى
و طبعا اكيد بتتنرفزوا بعد خمس دقايق و بيبقى اسلوبكم فى الحضيض فالمشكلة تكبر اكتر
هو دا السيناريو المعتاد لاى خناقة زوجية
عارف
انا فى سنة من سنوات حياتى لما وصلت الخلافات بيننا لحد لايطاق عملت ايه ؟
قعدت جبت ورقة و قلم
و حددت بالظبط نقاط الاختلاف الى دايما بتقلب بمشكلة
و قعدت قست الاختلافات دى بميزان الحلال و الحرام القانون الالهى ....لقيتها مفيش حاجة حرام الحمد لله
طب بميزان القانون البشرى ..مفيش مخالفات او جرائم او جنح
لقيت اغلب اختلافاتنا هى اختلاف عادات و تقاليد
طب هل العادات و التقاليد دى تصح ان تكون مقياس للصح و الغلط ؟
لأ
لانها بتختلف من عيلة للتانية و من بلد للتانية و من محافظة للتانية و من دولة للتانية و من الشرق الاوسط عن الشرق الادنى
طالما احنا مختلفين فى العادات يبقى مفيش صح و غلط
فيه اختلاف
ناس بتاكل طبيخ على العشاء و ناس بتاكله على الغدا
ناس غاوية سهر للفجر و ناس بتنام بعد العشا
عيلة الراجل فيها هو الى بيروح السوق و عيلة الست الى بتروحه
عيلة منفتحة على بعضها و كل واحد عارف عن كل واحد كل حاجة و عيلة منغلقة و كل واحد عايش مع كينونته
عيلة البنات و الصبيان فيها منفتحين و بيتعاملوا كاخوات و عيلة تانية منغلقين
الاختلافات لاتعد و لا تحصى و مفيش فيها صح و غلط يبقى انا اتعب اعصابى ليه
بدأت اقول لزوجى احنا مختلفين فى النقطة دى بدل ما اقوله انت غلط و انا صح
و احدد بالظبط السبب لانك اتعودت على كذا و انا اتعودت على كذا
طب الحل ايه ؟
الحل انى هقدم تنازل المرة دى
و انت تقدم تنازل المرة الجاية لو حاجة هنعملها مع بعض
لو مفيش حاجة هنعملها مع بعض يبقى كل واحد حر يعمل الى يريحه طالما مش هيأثر على التانى
لقيت اغلب نقاط الاختلاف اتحلت
و فيه حاجات انا تنازلت عنها و خليت ليه التصرف فيها لانى لقيته الاشطر فيها زى الامور الاقتصادية
و فيه امور هو بدأ يهاودنى فيها لانى الاشطر فيها زى تربية الاولاد
لو انتوا الاتنين فى بداية حياتكم و لسة بتعكوا فى البداية
يبقى اقعدوا اتفقوا هتعملوا ايه مع بعض فى كل حاجة مع كامل الاهتراف بانكم لسة بتتدربوا و مش عارفين حاجة و بتعكوا انتوا الاتنين
و علشان محدش يعد يقول للتانى انت الى عملت الغلط
الاختلاف ممكن يتحول لصراع لو كل واحد فيكم مصمم على رايه و ان هو بس الى بيفهم
و المركب الى فيها ريسين بتغرق
لكن الاختلاف بيبقى تكامل و تعاون لو كل واحد فهم قدراته و نقاط ضعفه و حاول يعوض نقطة ضعفه بقوة الاخر
و يفهم ان مفيش حد بيفهم فى كل حاجة
و مفيش حد عارف كل حاجة
فنتعاون مع بعض علشان نكمل بعض و المركب تمشى بقوة
ليست هناك تعليقات:
إرسال تعليق