أيوة ممكن
لا تتقبلى التصرف نفسه ..لان التصرف غلط و حرام
و لكن تقبلى ان مفيش حد معصوم من الغلط
و ان دا ربنا ابتلاه بهذا الحرام الى بيقع فيه
و زى ماهو بيخون
ما انت ممكن تكذبى و تغتابى و تتجسىى و تسيئى الظن وتنقلى كلام و تشتمى ولادك و تضربيهم ..هى دى يعنى مش ذنوب كلنا بنقع فيها يوميا
محدش فى الدنيا معصوم من الغلط
و لو حاسة ان الخيانة دى اساءة ليك
طب ما احنا ياما بنسىء لازواجنا بالغيبة و الكلام عليهم فى غيابهم
تفتكرى لو جوزك شاف الشات الى انت كاتباه لصحبتك و الا لمامتك عليه ..هيبقى احساسه ايه ؟
انا لا أبرر الخطأ
ولا اقلل من قيمة فعل الخيانة
و لكنى بوجه كلامى تحديدا للمرأة الى عايزة تكمل مع جوزها و هو خاين ..ازاى تقدر تعيش معاه
اولا : ان محدش فى الدنيا معصوم
ثانيا : اننا بنسىء لازواجنا زى ماهم بيسيئوا لينا
ثالثا و دى الأهم
ان انت مش هتتحاسبى على خيانته ادام ربنا ..هو مسئول ادام ربنا عن تصرفاته
للاسف المجتمع الى احنا عايشين فيه دايما محسس الست ان جوزها زى العيل الصغير لازم تكون دايما عينيها عليه احسن يتوه
و دا بيخلى عندها احساس مزمن بالذنب
لو هو ولد فلتان يبقى امه ماربتوش قبل الزواج
و لو فلتان بعد الزواج يبقى زوجته مش مالية عينه ...
و صاحبته هى الى واكلة عقله و بتضحك عليه و بتجرى وراه
و هو ياعين امه مسكين و غلبان زى الريشة فى مهب الريح لايملك من أمر نفسه شىء
التفكير دا غلط تماما
محدش مسئول عن حد
حتى ولادك اول مايبلغوا و يبقوا مكلفين هم بيتحاسبوا خلاص ادام ربنا على اعمالهم ...انت مش عليك الا النصيحة بالحسنى
لازم تنزعى من تفكيرك فكرة انك مسئولة عنه تماما ..و مسئولة عن اخطائه و تبطلى الاحساس بالذنب
رابعا : دورى على نفسك و سعادتك ...ركزى على نفسك انت ..اشغلى نفسك بنشاطات ممتعة و مهمة ليكى ..فكرى فى حياتك انت بعيدا عنه عايزة تعملى ايه ..
فكرى كمان بشوية انانية
دلوقت دا شريك حياتى ....و هو بصفة عامة كويس معايا .
و ممكن استفيد منه حاجات كتيييرة (لو هو تعامله معايا كويس ) ...
يعنى دى لما يكون بيحبك و بصفة عامة زوج واب كويس و خسارة يتساب لحد تانى
انا مستفيدة منه كراعى و حامى وزوج و اب لاولادى
طب دا انا الى كسبانة
هو قاعد يلاغى البنات و يكلمهم ...
بس فى النهاية بينام فى حضنى انا و بينام معايا أنا ..و خيره كله ماديا و معنويا بتاعى انا
انا الى مستفيدة فى الآخر
تفكير صعب ...بس يمشى مع البنات العمليين
خامسا : توقفى تماما و من دلوقت عن التجسس و مراقبة موبايله
و عليكى بالدعااااااء ..فانه سلاح المؤمن
كانت واحدة صحبتى بتقولى :
كنت لما احس بعلاقة جديدة فى حياته اقول يارب وريله آية من آياتك و انتقم حتى يرى ذنوبه
فتنزل عليه المصيبة من دول تخليه يلف حوالين نفسه ...
وكنت ألفت نظره ان دا اكيد بذنب ....وانا كنت ببقى متاكدة ان فيه حد فى حياته وكان احساسى قوى بكدة
فبدأ يحس بكدة فعلا ..و اتصلح حاله مع الوقت ..و زهق
بأكد تانى
كلامى دا مع الى متجوزة واحد بتاع بنات بس هو كويس معاها بصفة عامة و هى عايزة تكمل معاه
ازاى تحاول تتقبله بعبله و تصبر عليه لحد ما ربنا يصلح حاله
احساس طبعا صعب ...بس ممكن
أما لو هو سىء الخلق معاها او خياناته حقيقية و جنسية أو هى مش قادرة تتكيف و تتعايش فدى مفيش أدامها الا الطلاق طبعا
المرة الاخيرة دا مش مبرر للراجل انه يخون
و لكن هى مساعدة للمرأة انها تتكيف
ليست هناك تعليقات:
إرسال تعليق