السؤال دا بيجيلى كتيير أوى من بنات و شباب عايزنى اكتب لهم حجاب المحبة
مفيش وصفة معينة مفعولها اكيد و ماتخرش الماية تخلى التانى يحبك
فالقلوب بين اصابع الرحمن يقلبها كيف يشاء
و شفت ناس كتير مشيوا على الحبال و تسلقوا الجبال و عملوا المحال و مفيش فايدة
بس فيه دراسات كتير اتعملت فى الموضوع دا
قالوا ان الولد بيحب والدته و البنت بتحب ابوها و بتنجذب لاى حد يشبهه او يشبهها
بس طبعا فيه خطورة انك تمثل عليها او تمثلى عليه و تظهروا بشخصية مختلفة عن شخصيتك الحقيقية لان الحقيقة بتظهر بعد كدة شئت أم أبيت
قالوا ان الناس بتحب من يهتم بيها و بتفاصيلها يعنى ابداء الاهتمام و التركيز مع التفاصيل و حسن الاستماع و التعاطف والسؤال عنه كل شوية دا بيخلى التانى يحبك
بس دا برده لو اتمثل و مكانش نابع من جواك بيظهر مع الوقت لانك بتزهق من كتر التمثيل
قالوا ان الناس بتحب الشخصية المهذبة الخلوقة الذوق الى عندها معايير اخلاقية عالية و دى برده صعب انها تتمثل لانها بتنهار فى اول خلاف بينكم
البنت العربية بالذات بتحب الراجل الى تحس معاه بالامان يعنى بيهتم بيها و يراعيها و يحاول يسعدها و يساعدها لو عندها مشكلة و يقف معاها و كريم ماديا معاها ...الراجل الجدع الى ممكن تعتمد عليه فى حل المشكلات
و الرجل العربى بيحب البنت المهتمة بنفسها و باناقتها و بتطبخ كويس و مدبرة و بتحوش و مالهاش طلبات مادية و لا عاطفية و متفانية فى خدمته و رعايته مهما كانت عيوبه و مصايبه
لو عايزين رأيى خليكم على طبيعتكم تماما و لا تتصنعوا شخصية مش شخصيتكم
و اظهروا دا لمن تحبون
و لو هتعمل حاجة مش بتحبها فى بعض الاحيان يبقى علشان خاطره
يعنى لو واحد مش بيحب رغى الستات و معندوش طاقة للاستماع لحوارات ووحكايات يقول و يصرح
بس انا هسمعك دلوقت علشان خاطرك
و لو بنت مش بتحب الطبيخ و فاشلة فيه هتصارحه بس انا هحاول اتعلم علشان خاطرك
لو واحدة عندها طموحات مادية و بتحلم بشقة و فرح و شبكة و ...و...تقول و تعبر عن طموحها
بس انا عندى استعداد اتنازل علشان بحبك
و لو واحد معندوش اى رغبة فى المساعدة فى البيت و بيعتبر ان شغل البيت دا اعمال دونية لايقوم بها الا النساء يصرح بكدة
و يقول لها انا هحاول اساعد علشان خاطرك
مش مطلوب منك انك تغير و تبدل شخصيتك ابدا
ولا انك تمثل و تقوم بدور تقيل على قلبك
لكن ممكن تتغير فى اوقات معينة علشان خاطر من تحب وعلشان هو محتاج دا دلوقت
خليك صريح تماما مع من تحب علشان يفهم طبيعة شخصيتك الحقيقية
حبك على كدة خير و بركة
ماحبكش يبقى خير و بركة برده
احسن مايحب صورة مش موجوده و بعدين يتصدم بعد الجواز و يكرهك لانك خدعته و غشيته
ليست هناك تعليقات:
إرسال تعليق