قال : زوجتى دايما تزن على علشان يبقالى دور فى تربية الاولاد و انا بصراحة مابعرفش اتعامل مع الاطفال و لا بعرف المفروض اعمل لهم ايه
اخى الفاضل :
هون على نفسك ..الموضوع بس محتاج شوية معرفة و تدريب
انا مقدرة جدا ان الرجل بطبيعته العادية و تنشئته الاجتماعية بيكون غير مؤهل للتربية و التعامل مع الطفل
علشان كدة عمرنا ماشفنا راجل مدرس فى حضانة مثلا
والا شفنا راجل مربى فى دار ايتام
و الا سمعنا عن رجل اشتغل مدير منزل او جليس أطفال
الموضوع دا صعب عليكم اكيد
بس أى صعب فى الدنيا ممكن يسهل بشوية معرفة و شوية تدريب
مش مطلوب منك غير انك تقرأ موضوع على الانترنت زى مابتقرأ اخبار السياسة و الرياضة عن احتياجات الطفل
و تبدأ تراقب والدتهم بتعمل معاهم ايه
و تبدأ تفكر طب أنا ممكن اعمل معاهم ايه ..
اما حاجة بتعملها والدتهم اصلا فتشيل عنها حاجة او حاجتين
او حاجة جديدة مبتكرة هى متقدرش تعملها
يعنى ممكن تتعلم ازاى ترضع بالببرونة ..هى مش محتاجة حاجة غير انك تمسك الطفل كويس و تمسك الببرونة صح ..هل دا عمل صعب اوى ؟
وقت الرضاعة دا ممكن هى تعمل فيه حاجة تانية و توفر وقتها و تحس انك بتساعدها و حاسس بيها
ممكن تعد تلاعبه لما هى تكون مشغوله فى المطبخ ...و الله دا لعب الاطفال دا لذيذ جدا و خاصة لو لقيته بيضحك فى وشك وتسمع صوت ضحكته
ممكن لو كبير شوية تعد معاه بالراحة و هو بيكتب الواجب على أد ماتقدر و لحد ما اعصابك تتعب و هتبدأ تزعق سلمها المسئولية ....
بحيث مايكونش الضغط كله عليها و لما تزعق تعد تنتقدها انها بتزعق
الحقها قبل ما تزعق و خد النوباتجية ...يا اما تبدأ و هى تكمل
ممكن لو الطفل اكبر شوية تعد تسمعه بس ..
اسأله اخبارك ايه فى المدرسة و مين اصحابك و مين المدرسين و بتحب مين و بتكره مين ..انكشه و خليه يتكلم معاك و تابع معاه مشاكله و اظهر ليه الاهتمام علشان يحس انك مهتم
لو اكبر شوية خده معاك مرة و انت رايح لاصحابك (لو ما بتعملوش منكرات )
خده مرة النادى ساعة التدريب
خده مرة الجامع ساعة صلاة الجمعة
و استحمل شوية شقاوته و غلاسته و تساؤلاته ...دا حتى استحمل الاطفال بيعلم الصبر
اعتقد ان دى حاجات بسيطة ممكن حضرتك تعملها لو انت عايز
المهم يبقى عندك الرغبة
هتلاقى القدرة بتيجى بالتدريب
وماتعدش ترمى حمل التربية و العناية على مراتك بس ...
لان ثبت ان الى الست بتبنيه فى شهر بيتهد فى ساعة ادام وسائل الاعلام والا صفحات الويب فمحتاجة حد يساعدها
و مش هيساعدها زى الاب
خليك اب مهتم و راعى لاولادك مش مجرد بنك ليهم
لانك هتحتاج لحنانهم و عطفهم و اهتمامهم دا لما تكبر
و بعدين لما تفتقده تقول عليهم ابناء غير بررة ..و انت اصلا ماكنتش أب بار بيهم فى صغرهم
ليست هناك تعليقات:
إرسال تعليق