زوجى رائع مع الناس

قالت : زوجى انسان رائع اجتماعيا و الناس تحب تستشيره فى مشاكلهم الاسرية و المهنية و بيقدم لهم حلول رائعة لكن معايا أنا مش كدة خالص

حبيبتى :

دا أمر طبيعى جدا

الانسان لما يكون طرف محايد بعيد عن المشكلة بيطرح حلول عادلة و منطقية جدا بعيدا عن الحلول الانفعالية و العاطفية

يعنى انت كأم او زوجة لما تيجى واحدة تستشيرك فى حل لمشكلتها بتقوليلها الحلول بشكل منطقى جدا

لكن لما صحبتك او اختك او حبيبتك بتطرح عليكى مشكلة انفعالك معاها اكيد هيأثر على حيادك و هتكونى متعاطفة معاها اكتر و ممكن الحلول الى بتطرحيها تيجى بشكل تحيزى

و دا غير خالص لما تقعى انت نفسك فى نفس المشكلة بتكونى منفعلة اكتر و متحيزة اكتر لنفسك فبطرحى حلول الى تريحك مش الى تريح الطرفين

كل الناس كدة
جوزك ممكن يقول حلول و اقتراحات لزمايله رائعة
لكن لما ييجى يقولك حلول لمشكلاتك الى هو اكيد طرف فيها هيقول الحل الى يريحه اكتر
او الى مايحطش عليه مسئولية اكبر او الى هيبسطه اكتر

كلنا كدة بلا استثناء كدة

زى بالظبط الطبيب الجراح الى بيعمل كل يوم عشرات من العمليات و مايقدرش يعمل نفس العملية لابنه

أنا عن نفسى لما حد بحبه ييجى يشتكيلى من مشكله
و احس نفسى انفعلت بيها برفض طرح حلول ..او بقوله بصراحة انا انفعلت و مش هقدر اديك حلول عادلة
لانى ببقى عارفة ان حلولى هتكون متحيزة

المهم نكون واعيين لنفسنا و مشاعرنا علشان لانحكم على الناس بالظلم

ربنا حذرنا من الكره و الانفعال الذى يؤدى الى الحكم الظالم

﴿يَا أَيُّهَا الَّذِينَ آَمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلَا يَجْرِمَنَّكُمْ شَنَآَنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ )

و حذرنا من اتباع الهوى و التحيز للنفس و للاقرباء

{ يَا أَيُّهَا الَّذِينَ آمَنُواْ كُونُواْ قَوَّامِينَ بِالْقِسْطِ شُهَدَاء لِلّهِ وَلَوْ عَلَى أَنفُسِكُمْ أَوِ الْوَالِدَيْنِ وَالأَقْرَبِينَ إِن يَكُنْ غَنِيّاً أَوْ فَقَيراً فَاللّهُ أَوْلَى بِهِمَا فَلاَ تَتَّبِعُواْ الْهَوَى أَن تَعْدِلُواْ وَإِن تَلْوُواْ أَوْ تُعْرِضُواْ فَإِنَّ اللّهَ كَانَ بِمَا تَعْمَلُونَ خَبِيراً }

و نسأل الله أن يسدد أقوالنا و افعالنا و يقينا شر الهوى و الغضب و التحيز