سألت : هل الكلام ساعة الغضب بيبقى كلام حقيقى ؟
انا جوزى ساعة الغضب بيقول كلام جارح جدا جدا
بصى ياحبيبتى :
الانسان ساعة الغضب بيبقى عامل زى المجنون بيهبل بأى كلام علشان يجرح الاخر
ما تحاسبيش جوزك على كلامه ساعة الغضب لان الغضب بيطمس على العقل و بيحط الانسان فى موقف اهرب او اضرب
و الراجل غالبا بيضرب بلسانه
لما تهدوا و تتصالحوا و يبقى مزاجكم كويس قوليله انت قلت كذا و كذا
هل انت تقصد هذا الكلام بجد ؟
و شوفى كلامه ازاى بعد مايهدا
فيه رجالة بجحة هيقولك ايوة انا قصدى كذا ..يبقى دى قناعاته فعلا و دى لازم تاخدى فيها موقف حازم
و فيه رجالة هتحاول تتوه الكلام و لسان حالها بيقول ماتاخديش على كلامى و بلاش تحاسبينى على لحظات ضعفى
و فيه رجالة هتنكر تماما انها قالت الكلام دا
و فيه رجالة هتحاول تراضيك او تعتذر
و فيه رجالة هتتجاهلك تماما و مش هتعرف ترد
نفسيا
أكبر خدمة ممكن تعمليها لجوزك ان تحتوى لحظات ضعفه دى و تعديها و لا تحاسبيه عليها و تتعاملى معاها زى واحد مجنون جت له الكريزة او الحالة
او زى طفل صغير جت له حالة الغضب و الزن و محتاج احتواء
الست الى بتقدر تعمل كدة هى الى بتتربع على عرش قلب جوزها بكل سهولة
ودا فى حالة لو كان اصلا بيحترمها و علاقته بيها بصفة عامة كويسة
يعنى مفيش فيه عيب الا دا
لكن لو مفيش اصلا احترام و علاقته بيها سيئة و دى احد مظاهر السوء
و نظرته ليها دونية و بيحتقرها و الكلام الجارح دا هو يقصده
فالانسان دا محتاج واقفة و موقف حازم طبعا
و للاسف قدرات النساء على هذا الاحتواء مختلفة
فيه واحدة عاقلة ممكن تهدى الموقف
وواحدة شعنونة ممكن تولعها حريقة
ليست هناك تعليقات:
إرسال تعليق